په افغانستان کې سېلابونه
ملګرو ملتونو په میدان وردګو کې له سېلاب ځپلو کورنیو سره مرسته وکړه
ایکنا – (میدان وردګ) په افغانستان کې د ملګرو ملتونو د بشري مرستو د همغږۍ دفتر (OCHA) اعلان کړی، چې په میدان وردګو ولایت کې د وروستیو سېلابونو له امله له زیانمنو شویو څه باندې ۱۰۰۰ کورنیو سره مرستې شوې دي.
ایکنا د افغان غږ خبري آژانس په حواله راپور ورکوي چې په افغانستان کې د ملګرو ملتونو د بشري مرستو د همغږۍ دفتر (OCHA) په یوه ټویټ کې ویلي چې دغه مرستې د روغتیا ، د څښاک پاکو اوبو، خوراکي توکو او نورو برخو کې دي او د دغه ولایت په ۷ ولسوالیو کې د موقتي سرپناه د جوړولو کار پیل شوی دی.
په افغانستان کې د ملګرو ملتونو د بشري مرستو د همغږۍ دفتر د دغو مرستو د دقیق شمېر په اړه څه نه دي ویلي.
د اوچا د راپور له مخې، په میدان وردګو کې د سېلابونو له امله ۳۰ تنه مړه او ۲۵ نور ټپیان شوي دي.
د معلوماتو پر بنسټ، د دغو سېلابونو په پایله کې د استوګنې ۴۰۰ کورونه په بشپړه توګه ویجاړ شوي او ۶۰۰ نور کورونه زیانمن شوي دي.
د يادونې وړ ده، چې په تېرو څو ورځو کې په ميدان وردګو ولايت او د هېواد په يو شمېر سيمو کې سېلابونو درانه مالي زيانونه اړولي دي.
